མདོ་ཁམས་སྡེ་དགེའི་མངའ་ཁུལ་ནས་ཕེབས་པ་རྣམས་གླིང་པ་ཁང་ཚན་དུ་གཏོགས་པ་ཡིན། མདོ་སྨད་དཀར་མཛེས་ཁུལ་དང་། ཨ་མདོ། འགོ་ལོག་ཁུལ་དང་། གཞིས་རྩེ་གྲྭས་ཁུལ་ནས་ཕེབས་པ་རྣམས། རོང་པོ་ཁང་ཚན་དུ་གཏོགས། སྒ་སྟོད་ཁུལ་དང་། འདན་ཁོག་ཁུལ་ནས་ཕེབས་པ་རྣམས་འདན་མ་ཁང་ཚན་དུ་གཏོགས། ཉག་རོང་། ལི་ཐང་། རྟའུ་ཁུལ་ནས་ཕེབས་པ་རྣམས་དཔོན་པོ་ཁང་ཚན་དུ་གཏོགས། བྲག་གཡབ་དང་། སྨར་ཁམས། ཁྲོ་གཞིས་ཀའི་མངའ་ཁུངས། རྐང་བཞི་བཅས་ནས་ཕེབས་པ་རྣམས་ཉག་རེ་ཁང་ཚན་དུ་གཏོགས། གློ་བོ་དང་བྱང་གནམ་མཚོ་ཡན་ནས་གསེར་པ་དང་ལྗོངས་ནག་གཉིས། ནག་ཚང་མཚོ་དྲུག །འབྲོང་པ་སྟོད་སྨད་གཉིས། གཞིས་རྩེའི་ཁུལ་དུ་གཞིས་ཆགས་བལ་པོའི་མི་བརྒྱུད་བཅས་ནས་ཕེབས་པ་རྣམས་གློ་བོ་ཁང་ཚན་དུ་གཏོགས། ས་སྐྱ་ཁུལ་དང་། དེའི་ཉེ་འཁོར་ནས་ཕེབས་པ་ཕལ་ཆེར་ཆུ་འདུས་ཁང་ཚན་དུ་གཏོགས། སྟོད་མངའ་རིས་ཁུལ་ནས་ཕེབས་པ་རྣམས་ཞི་བདེ་ཁང་ཚན་དུ་གཏོགས། བྱང་ཁུལ་ཕྲུ་མ་དྲུག་ཅུའི་ཁུལ་དང་། རྟ་ནག་ཁུལ་ནས་ཕེབས་པ་རྣམས་འབུམ་པ་ཁང་ཚན་དུ་གཏོགས། སྡེ་དགེ་འཇོ་མདའ་ཁུལ་དང་། གོ་འཇོ་ཁུལ་ཕལ་ཆེར་ལྷོ་པ་ཁང་ཚན་དུ་གཏོགས་པ་བཅས་གསལ་ཞིང་། དུས་འགྱུར་རྗེས་འཕགས་ཡུལ་དུ་ཁང་ཚན་གསར་བཞེངས་གནང་མེད།