༄༅། །ངོར་ལུགས་དཀྱིལ་འཁོར་བདུན་གྱི་ངོ་སྤྲོད།།
།བླ་མ་དང་གཉིས་སུ་མེད་པའི་ལྷག་པའི་ལྷ་མཆོག་རྣམས་ལ་སྒོ་གསུམ་གུས་པས་ཕྱག་འཚལ་ལོ། ངོར་ལུགས་དཀྱིལ་འཁོར་བདུན་གྱི་ལོ་རྒྱུས་མདོ་བསྡུས་ཙམ་བྲི་བ་བྱའོ། འདི་བཤད་པ་ལ་དཀྱིལ་འཁོར་བདུན་སྤྱིའི་སྐོར་བཤད་པ་དང་། དཀྱིལ་འཁོར་བདུན་སོ་སོའི་སྐོར་བཤད་པ། དཀྱིལ་འཁོར་གྱི་ཕན་ཡོན་སྐོར་བཤད་པ་དང་གསུམ་ལས། དང་པོ་ནི། ངོར་ལུགས་དཀྱིལ་འཁོར་བདུན་ཞེས་པ་འདི་ནི། གདན་ས་ཆེན་པོ་དཔལ་ངོར་ཨེ་ཝྃ་ཆོས་ལྡན་དུ་གསང་སྔགས་ཀྱི་རྒྱུད་སྡེ་བཞི་དང་འབྲེལ་བའི་སྒྲུབ་མཆོད་མི་འདྲ་བ་ཁག་མང་དུ་ཡོད་པ་ལས། བླ་མེད་ཀྱི་དཀྱིལ་འཁོར་ཆེན་པོ་བདུན་གྱི་སྒྲུབ་མཆོད་ཁག་ཡིན་ལ། སྤྱིར་གསང་སྔགས་བླ་མེད་ཀྱི་རྒྱུད་ལ་ནང་ཚན་གྱི་དབྱེ་ན་ཕ་རྒྱུད་དང་། མ་རྒྱུད། གཉིས་མེད་ཀྱི་རྒྱུད་དང་གསུམ་ཡོད་པས། འདིར་སྒྲུབ་མཆོད་ཁག་ནི་ཕ་རྒྱུད་གསང་འདུས་ཀྱི་སྐོར་ལ། ༡གསང་འདུས་མི་བསྐྱོད་པ་དང་། ༢གསང་འདུས་འཇམ་པའི་རྡོ་རྗེ་སྟེ་གསང་འདུས་ཀྱི་སྐོར་གཉིས། མ་རྒྱུད་བདེ་མཆོག་གི་སྐོར་ལ། ༣བདེ་མཆོག་ལཱུ་ཧི་པ་དང་། ༤བདེ་མཆོག་ནག་པོ་པ་སྟེ་བདེ་མཆོག་གི་སྐོར་གཉིས། ཟབ་པ་གཉིས་མེད་ཀྱི་རྒྱུད་ལ་༥ཀྱེ་རྡོར་རྩ་རྒྱུད་ལ་བརྟེན་པའི་སྒྲུབ་མཆོད་དང་། ༦བཤད་རྒྱུད་ཐུན་མོང་མ་ཡིན་པ་རྡོ་རྗེ་གུར་དང་། ༧ཐུན་མོང་བ་སམྦུ་ཊ་སྟེ་ཀྱེ་རྡོར་གྱི་སྐོར་སྒྲུབ་མཆོད་གསུམ་དང་བཅས། བླ་མེད་ཀྱི་དཀྱིལ་འཁོར་བདུན་པོ་འདི་དག་ལ་ངོར་ལུགས་དཀྱིལ་འཁོར་བདུན་ཞེས་ཞུས་པ་ཡིན་ནོ། འོ་ན་དཀྱིལ་འཁོར་བདུན་པོ་འདིར་ངོར་ལུགས་སུ་འགྱུར་ཚུལ་ཇི་ལྟར་ཡིན་ཞེ་ན། དཀྱིལ་འཁོར་བདུན་གྱི་བརྒྱུད་རིམ་ནི། ཐོག་མ་རྡོ་རྗེ་འཆང་ནས་འཕགས་ཡུལ་གྱི་གྲུབ་ཆེན་སོ་སོར་བཀའ་བབས་ཏེ། རིམ་བཞིན་བོད་གངས་ཅན་གྱི་ལྗོངས་སུ་ལོ་ཙཱ་བ་ཆེན་པོ་རྣམས་ལས་རྗེ་བཙུན་གོང་མ་ལྔར་བཀའ་བབས་ཤིང་། དེ་ནས་བརྒྱུད་དེ་ངོར་ཆེན་རྡོ་རྗེ་འཆང་ཀུན་དགའ་བཟང་པོའི་བཀའ་སྲོལ་ད་ལྟའི་བར་སྨིན་གྲོལ་གྱི་བརྒྱུད་པ་མ་ཉམས་པར་ཡོད་པའི་ཚུལ་འོག་ནས་འཆད་པ་ལྟར་ཡིན་ལ། སྤྱི་ལོ་༡༤༥༦ལོར་ངོར་ཆེན་རྡོ་རྗེ་འཆང་ཀུན་དགའ་བཟང་པོ་སྐུ་མྱ་ངན་ལས་འདས་སྐབས་སུ་གང་གི་རྒྱལ་ཚབ་མུས་ཆེན་སེམས་དཔལ་ཆེན་པོས། གོང་དུ་བཤད་པའི་བླ་མེད་ཀྱི་དཀྱིལ་འཁོར་ཆེན་པོ་བདུན་ངོར་ཆེན་རྡོ་རྗེ་འཆང་ཀུན་དགའ་བཟང་པོའི་བཀའ་སྲོལ་ལྟར་རྡུལ་ཚོན་གྱི་དཀྱིལ་འཁོར་བཞེངས་ཏེ། ངོར་ཆེན་གྱི་དགོངས་རྫོགས་སུ་དཀྱིལ་འཁོར་བདུན་ལྷན་ཅིག་ཏུ་འཚོགས་པས།
དེ་ནས་བཟུང་ངོར་ལུགས་དཀྱིལ་འཁོར་བདུན་ཞེས་སྙན་པའི་གྲགས་པ་འཛིན་མའི་ཁྱོན་ཀུན་ཏུ་ཁྱབ་པར་བྱུང་བ་ཡིན་ནོ། དེ་ནས་བཟུང་སྤྱི་ལོ་༡༩༥༩ལོར་དུས་འགྱུར་མ་བྱུང་གི་བར་ལོ་ལྔ་བརྒྱ་ལྷག་ཙམ་གྱི་རིང་ལ་གདན་ས་ཆེན་པོ་དཔལ་ངོར་ཨེ་ཝྃ་ཆོས་ལྡན་དུ་ལོ་ལྟར་འདུ་ཁང་ཆེན་མོའི་ནང་དུ་དབུས་སུ་ཀྱེ་རྡོར་དང་ཟུར་གཉིས་ལ། གུར་དང་། སྃ་ཊ་གཉིས། ཟུར་གཞན་གཉིས་ལ་གསང་འདུས་དང་བདེ་མཆོག་གཉིས་གང་རུང་རེ་རེའི་རེས་མོས་སུ། བོད་ཟླ་བཞི་པའི་ཚེས་ཉི་ཤུ་གཉིས་ནས་དབུ་འཛུགས་སྟེ་དཀྱིལ་འཁོར་ལྔའི་སྒྲུབ་མཆོད་ལྷན་ཅིག་ཏུ་འཚོགས་སྲོལ་ཡོད་ཅིང་། དབུས་ཀྱི་ཀྱེ་རྡོར་གྱི་རྡོ་རྗེ་སློབ་དཔོན་ནི། ངོར་མཁན་པོ་ཁྲི་བས་མཛད་པ་དང་ཟུར་བཞིར་བསྙེན་སོང་གི་རྡོ་རྗེ་སློབ་དཔོན་བཞིས་མཛད་དེ། འདོན་པ་རྣམས་ཀྱང་དལ་པོའི་ངང་སྒྲུབ་མཆོད་ལྔའི་ཆོ་ག་འདོན་མཚམས་རྣམས་ཀྱང་། ཕན་ཚུན་བསྒྲིགས་ནས་འདོན་དགོས་པ་ལས་སློབ་དཔོན་སོ་སོས་འདོད་མོས་ལྟར་འདོན་མི་ཆོག་ཅིང་། སྔགས་དང་ཕྱག་རྒྱ་དང་ཏིང་ངེ་འཛིན་ཡ་མ་བྲལ་བའི་སྒོ་ནས་་ཉིན་འཚོགས་དང་། མཚན་འཚོགས་བཅས་ཉིན་ཞག་རེར་ཆོ་ག་ཚར་གཉིས་རེ་འདོན་སྲོལ་ཡོད། ཆོག་གྲྭ་བ་རྣམས་ཀྱིས་ཆོ་ག་ཚང་མ་བློ་ཐོག་ནས་འདོན་བཞིན་དགའ་དད་སྤྲོ་གསུམ་ངང་ནས་ངོར་པའི་སྒྲུབ་མཆོད་ཆེན་མོ་འཚོགས་བའི་ཕྱག་སྲོལ་བཟང་པོ་བྱུང་ཡོད། སྒྲུབ་མཆོད་འཚོགས་སྟངས་ནི་བོད་ཟླ་བཞི་པའི་ཚེས་༢༢ཉིན་གུར་གྱི་ས་ཆོག་འཚོགས་དགོས་ཤིང་། ས་ཆོག་གྲུབ་པ་དང་དཀྱིལ་འཁོར་ལྔ་སོ་སོར་སྐྱ་ཐིག་རྒྱག་སྟེ་མཆོད་པ་རྣམས་རྒྱས་སྤྲོས་སུ་བཤམས་སྲོལ་ཡོད། དེ་ནས་སྒྲུབ་མཆོད་ཀྱི་རྟ་གོན་མཚན་མོ་ཆུ་ཚོད་བཅུ་གཉིས་སམ་དང་པོ་ཙམ་ནས་དབུ་འཛུགས་ཏེ་དེའི་ཕྱི་ཉིན་སྔ་དྲོ་ཆུ་ཚོད་བརྒྱད་པ་ཙམ་ནས་རྟ་གོན་འདོན་གྲུབ་པ་མཛད། དེ་ནས་དེའི་ཉིན་མོར་དཀྱིལ་འཁོར་སོ་སོར་རྡུལ་ཚོན་རྣམས་ཕྱོགས་སོ་སོས་བླུག་བཞིན་ཡོད། སྒྲུབ་མཆོད་ཀྱི་དངོས་གཞིའི་སྐབས་སུ་མཚན་མོ་ཆུ་ཚོད་བཅུ་གཅིག་ཙམ་ནས་འདོན་པ་དབུ་འཛུགས་ཏེ། དེའི་ཕྱི་ཉིན་མོ་སྔ་དྲོ་ཆུ་ཚོད་བརྒྱད་པ་ཙམ་གྱི་བར་དུ་ཆོ་ག་ཚར་གཅིག་གྲུབ་པ་མཛད།
དེ་ནས་ཆུ་ཚོད་གཅིག་ཙམ་བར་སེང་མཛད་དེ་སླར་ཡང་སྔ་དྲོ་ཆུ་ཚོད་དགུ་པ་ཙམ་ནས་ཕྱི་དྲོ་ཆུ་ཚོད་ལྔ་པ་ཙམ་ལ་ཆོ་ག་ཚར་གཅིག་གྲུབ་པ་མཛད་དོ། དེ་ལྟ་བུའི་དངོས་གཞི་ཉིན་ཞག་དྲུག་གི་རིང་ལ་བདག་མདུན་བུམ་གསུམ་དང་མཆོད་བསྟོད་རྒྱས་པ་ཕྱི་རོལ་གཏོར་མ་བདག་འཇུག་བླངས་པ་སོགས། མཐོང་བ་བརྒྱུད་པའི་ཕྱག་ལེན་མ་ཉམས་པར་གདངས་དབྱངས་དང་བཅས་པའི་འཚོག་བཞིན་ཡོད། ཚེས་༢༥ཉིན་སྒྲུབ་མཆོད་ཁག་སྔ་བཞིན་དང་དེའི་སྟེང་དུ་འཚོགས་པ་ལྔ་ལྷན་གཅིག་ཏུ་བླ་མཆོད་འདོན་དགོས། དངོས་གཞི་མཐའ་མའི་ཉིན་སྒྲུབ་མཆོད་ཀྱི་ཆོ་ག་གྲུབ་སྟེ་དཀྱིལ་འཁོར་གཤེགས་གསོལ་མཛད་ཟིན་པ་དང་། དཀྱིལ་འཁོར་ལྔའི་བླ་སློབ་ཚང་མ་ལྷན་དུ་འཛོམས་ཏེ་པུ་ཊའི་གར་འཁྱམས་མཛད། དེ་གྲུབ་པ་དང་ཁང་ཐོག་ཏུ་ཆོས་སྐྱོང་ལ་གཏོར་འབུལ་སོགས་ཕུལ་ཏེ། ལོ་དེའི་ངོར་པའི་སྒྲུབ་མཆོད་ཆེན་མོ་ལེགས་པར་གྲུབ་པ་ཡིན་ནོ། དུས་འགྱུར་བྱུང་བའི་རྗེས་འཕགས་ཡུལ་དུ་ངོར་ཨེ་ཝྃ་ཆོས་ལྡན་བྱེས་ཀྱི་གདན་ས་རུ་སྒྲུབ་མཆོད་ཆེན་མོའི་སྐབས་སྔ་སྲོལ་བཟང་པོ་མ་ཉམས་པར་འཚོག་བཞིན་ཡོད་ཀྱང་། ཡུལ་དུས་ཀྱིས་དབང་གི་ཆོ་ག་རྣམས་ཉིན་རེར་ཚར་རེ་རེ་ལས་འདོན་གྱི་མེད། སྒྲུབ་མཆོད་ཀྱི་ཆོ་ག་རྣམས་ནི་གོང་ཞུས་ལྟར་མུས་ཆེན་སྐབས་ནས་ཡོད་ཀྱང་ཕྱིས་སུ་ངོར་དཔོན་སློབ་ངག་དབང་ལེགས་གྲུབ་ཀྱིས་ཁ་འབབས་རྣམས་བཞིའི་རྒྱུན་ལྟར་འདོན་ཆོག་ཏུ་བསྒྲིགས་ཡོད་ལ། དུས་འགྱུར་གྱི་རྗེས་འཕགས་ཡུལ་དཔལ་ངོར་ཨེ་ཝྃ་ཆོས་ལྡན་དུ་བདག་ཅག་རྣམས་ཀྱི་འདྲེན་མཆོག་བླ་མ་དམ་པ། ངོར་ཤར་ཆེན་༧ཀླུང་ལྡིང་མཁན་ཆེན་འཇམ་དབྱངས་བསྟན་པའི་ཉི་མས་བློ་དམན་རྣམས་ཀྱིས་ཀྱང་བཀླག་ཆོག་གི་ཚུལ་དུ་ནགས་འགྲོས་སུ་བཟོས་གནང་ཡོད། གཉིས་པ་དཀྱིལ་འཁོར་བདུན་སོ་སོའི་སྐོར་བཤད་པ་ལ། སྤྱིར་ངོར་ལུགས་དཀྱིལ་འཁོར་བདུན་ནི་རྒྱུད་སྡེ་བཞི་ལས་གོང་དུ་བཤད་པ་ལྟར་བླ་མེད་ཀྱི་ཁོངས་སུ་གཏོགས་པ་ཡིན་པས། དེ་ལ་རྒྱུད་སྡེའི་སྒོ་ནས་དབྱེ་ན། ཐབས་སམ་བསྐྱེད་རིམ་གཙོ་བོར་སྟོན་པ་ཕ་རྒྱུད་དང་། ཤེས་རབ་སམ་རྫོགས་རིམ་གཙོ་བོར་སྟོན་པ་མ་རྒྱུད། དེ་གཉིས་ཀའི་ཁྱབ་བྱེད་དུ་གྱུར་པ་ཟུང་འཇུག་གཙོ་བོར་སྟོན་པ་གཉིས་མེད་ཀྱི་རྒྱུད་དང་གསུམ་ཡོད། དང་པོ་ཕ་རྒྱུད་ལའང་། ཟླ་གསང་ཐིག་ལེ་ལས། འདོད་ཆགས་ཞེ་སྡང་གཏི་མུག་གིས། །རྒྱུད་ཀྱང་རྣམ་པ་གསུམ་དུ་འགྱུར། །ཞེས་གསུངས་པ་ལྟར། གདུལ་བྱ་འདོད་ཆགས་ཅན་གཙོ་བོར་རྗེས་སུ་གཟུང་བའི་དོན་དུ་གསུངས་པ་གསང་བ་འདུས་པའི་སྐོར། གདུལ་བྱ་ཞེ་སྡང་ཅན་གཙོ་བོར་རྗེས་སུ་གཟུང་བའི་དོན་དུ་གསུངས་པ་དཔལ་གཤིན་རྗེའི་གཤེད་ཀྱི་སྐོར། གདུལ་བྱ་གཏི་མུག་ཅན་གཙོ་བོར་རྗེས་སུ་གཟུང་བའི་དོན་དུ་གསུངས་པ་རྣམ་སྣང་སྒྱུ་འཕྲུལ་དྲྭ་བའི་སྐོར་དང་གསུམ་ཡོད་པ་ལས། དང་པོ་གསང་འདུས་རྩ་རྒྱུད་ལེའུ་བཅུ་བདུན་པ་ལས་གཙོ་བོའི་དབྱེ་བའི་དཀྱིལ་འཁོར་སོ་གཉིས་ཙམ་སྟོན་པ་དང་། དེའི་རྒྱུད་ཕྱི་མ་དང་། བཤད་རྒྱུད་དགོངས་པ་ལུང་བསྟན་དང་། རྡོ་རྗེ་ཕྲེང་བ། ལྷ་མོ་བཞིས་ཞུས། ཡེ་ཤེས་རྡོ་རྗེ་ཀུན་ལས་བཏུས་པ། རྡོ་རྗེ་སྙིང་པོ་རྒྱན་གྱི་རྒྱུད་རྣམས་ལ་བརྟེན་ནས་འཕགས་ཡུལ་དུ་འདུས་པའི་སྲོལ་ཆེན་བདུན་ཙམ་བྱུང་བ་ལས།
